Mortal Kombat 2-rolprent getref met ‘n groot vertragingSeptember 2, 2025

Aanhangers wat gehoop het om die aksiebelaaide Mortal Kombat 2 vanjaar reeds te sien, moet nou langer wag. Warner Bros. het bevestig dat die fliek nou eers op 15 Mei 2026 in teaters gaan verskyn, ’n hele sewe maande later as die oorspronklik beplande 25 Oktober 2025. Volgens ’n verslag van Deadline hou die vertraging waarskynlik verband met die sterk kompetisie by die loket, onder meer die biografiese drama Springsteen: Deliver Me From Nowhere met Jeremy Allen White in die hoofrol. Oktober is boonop ’n moeilike maand vir groot vrystellings, aangesien Halloween-aktiwiteite dikwels teaterbesoeke ondermyn.

Die skuif is veral teleurstellend aangesien die lokprent vir die opvolg reeds ’n rekord gebreek het met meer as 107 miljoen kyke binne 24 uur – die meeste vir enige voorskou nog. Tog was selfs dié reusebelangstelling nie genoeg om die oorspronklike vrystellingsdatum te behou nie. Die nuwe fliek beloon egter geduld. Karl Urban vertolk die ikoniese karakter Johnny Cage, wat sy buiging maak in die filmreeks. Hy sluit aan by bekende gesigte soos Sonia Blade, Raiden en ander kampioene wat die Aarde-ryk teen die dreigende heerskappy van Shao Kahn moet verdedig. Benewens Urban, sluit die rolverdeling onder meer Adeline Rudolph, Jessica McNamee, Josh Lawson, Ludi Lin, Mehcad Brooks, Tati Gabrielle, Lewis Tan, Damon Herriman, Chin Han, Tadanobu Asano, Joe Taslim en Hiroyuki Sanada in.

Die sinopsis beloof ’n “uiteindelike, onbeperkte, bloedige stryd”, waar geliefde karakters uit die speletjie-reeks terugkeer. Kritici het die eerste film gekap oor sy tempo en soms verwarrende storielyn, maar aanhangers hoop dat die opvolg die balans tussen intense gevegstonele en duidelike narratief beter sal tref. Vir nou bly daar net een sekerheid: Die wag op Mortal Kombat 2 gaan langer wees – en heel waarskynlik net so wreed soos die gevegte self.

Kyk gerus na die lokprent hieronder:

Fotos & video verskaf