Goed, beter, beetSeptember 2, 2025
Die bloeddrukverlagende effek van nitraatryke beetwortelsap by ouer mense kan te wyte wees aan spesifieke veranderinge in hul mondmikrobioom, volgens die grootste studie van sy soort.
Navorsers aan die Universiteit van Exeter in Engeland het die studie uitgevoer wat in die tydskrif Free Radical Biology and Medicine gepubliseer is. Dit het gevolg op vorige navorsing wat getoon het dat ‘n hoë nitraatdieet bloeddruk kan verlaag – wat weer die risiko van hartsiektes kan verminder.
Nitraat is noodsaaklik vir die liggaam en word as ‘n natuurlike deel van ‘n groenteryke dieët verbruik. Toe ouer volwassenes twee keer per dag vir twee weke ‘n gekonsentreerde ‘skoot’ beetwortelsap gedrink het, het hul bloeddruk gedaal – ‘n effek wat nie gesien is in ‘n jonger groep wat vir vergelyking gebruik is nie.
“Om ouer volwassenes aan te moedig om meer nitraatryke groente te eet, kan beduidende langtermyn gesondheidsvoordele inhou,” het die studie-outeur professor Anni Vanhatalo van die Universiteit van Exeter gesê.
“Ons weet dat ‘n nitraatryke dieet gesondheidsvoordele inhou, en ouer mense produseer minder van hul eie stikstofoksied soos hulle ouer word.”
“Die goeie nuus is dat as jy nie van beet hou nie, daar baie nitraatryke alternatiewe soos spinasie, rucola, vinkel, seldery en boerenkool is.”
Die studie het 39 volwassenes onder die ouderdom van 30 en 36 volwassenes in hul 60’s en 70’s gewerf (deur die NIHR Exeter Clinical Research Facility).
In beide groepe het die samestelling van die orale mikrobioom aansienlik verander na die drink van die nitraatryke beetwortelsap, maar hierdie veranderinge het verskil tussen die jonger en ouer ouderdomsgroepe.
Volgens Exeter News, “lewer die nuwe studie bewyse dat hierdie uitkoms waarskynlik veroorsaak is deur die onderdrukking van potensieel skadelike bakterieë in die mond. ’n Wanbalans tussen voordelige en skadelike mondbakterieë kan die omskakeling van nitraat (oorvloedig in groenteryke diëte) na stikstofoksied verminder – wat die sleutel is tot gesonde funksionering van die bloedvate, en dus die regulering van bloeddruk.”
Die ouer ouderdomsgroep het ‘n merkbare afname in die mondbakterieë Prevotella ervaar nadat hulle die sap gedrink het, tesame met ‘n toename in die groei van bakterieë wat bekend is om gesondheid te bevoordeel, soos Neisseria. Die ouer groep het ‘n hoër gemiddelde bloeddruk aan die begin van die studie gehad, wat gedaal het na die inname van die nitraatryke beetwortelsap, maar nie na die inname van die placebo-aanvulling nie.
Foto: Verskaf